كنت مطحون في امتحانات نصف السنة و في الأستعدادات الخاصة بالفترة دي
و بعد ما خلصت الامتحانات و قولت هأخد نفسي و هأريح وهأنام براحتي
أفتكرت ان عندي دورة التربية العسكرية لمدة أسبوعين ، اللي هما مدة الاجازة
مش قاااااااادر أقول لكم الاسبوعين دول كانوا عاملين إزاي
حقيقي أنا أستفدت حاجات كتير .... بس
الصحيان الساعة 6ص و الطابور الساعة 7.30
و بالزي الموحد اللي هو كاب أزرق و قميص أزرق و بنطلون جينز أزرق ، لبس المساجين
و ياريت على كدة وبس دة لسة في محاضرات و تدريب و بحوث و مناقشات
اللي كنت بأسمعه ... ان العسكرية دي تقضية
لكن سبحان الله كل حاجة عندنا كانت بتبقى بالورقة و القلم
بس لو عايزين الحق انا حبيت الفترة دي جداً
أولاً : جربت الدراسة من غير بنات و حقيقي فرقت معايا
ثانيا: إتعرفت على أصدقاء ولاد كتير و دة شيء انا مفتقده جداً
ثالثاً : عيشت تحت ضغط
رابعاً: أخذت ثقافة عسكرية محترمة جداً جداً
خامساً: عملت بحث في شخصية عسكرية و أخترت شخصية سيدي و تاج راسي
أخترت السيد عمر المختار و أتعرفت عليه أكتر و أكتر من خلال القرأة
سادساً و أخيراً : ما أنكرش إني إتعلمت شوية خشونة و صبر ، بس أكتر حاجة إتعلمتها إزاي أصبر
و ما أركزش على الخطوات على أد ما أركز على العائد اللي هيعود عليا من اللي أنا بأعمله
بس الحمد لله الفترة دي عدت على خير
بعد كل دة رجعت تاني لجو الدراسة الجامعية
بس رغم كل دة
ماأتمناش إني أدخل الجيش و لا الايام دي تكرر تاني
