أتناول في هذه التدويتة كيفية الأستعداد المتميز للعمرة
سأعتمد في ذلك على خبرتي السابقة حيث ان الله قد كتب لي الحمد لله زيارة بيته الشريف ومدينة نبيه العظيم في عام 2010
أول حاجة بجد لازم الواحد يفرح زي ما هو عاوز انه ربنا كتب له الرحلة دي ، لأن في أقاويل في الجانب دة أن انت كدة من اللي ربنا كتب لهم سماع ندأ سيدنا أبراهيم عليه السلام ، معتمدين على الأية التي تقول وَأَذِّنْ فِي النَّاسِ بِالْحَجِّ يَأْتُوكَ رِجَالًا وَعَلَى كُلِّ ضَامِرٍ يَأْتِينَ مِنْ كُلِّ فَجٍّ عَمِيقٍ
المهم ربنا كتب لك الزيارة ودة فضل كبير منه ، إذن لازم تستعد كويس جدا للزيارة دي
أولا أستعد كويس جدا المستوى النفسي من حيث القيمة الروحية ليها ودي اهم حاجة ، هنقسم الفرحة والأهتمامات جزئين فرحة على المستوى الذهني وفرحة على المستوى النفسي ، الفرحة بتاعة المستوى الذهني دي انت بتستوعبها وبتفرح بيها لكن مش بتبقى مسيطرة عليك كلك لأخر درجة ، لكن الفرحة اللي بتمتد للمستوى النفسي هي اللي بتسيطر عليك كلك ، بتهزك اوي وبتحس انك فرحان اوي ... فرحة تحقيق حاجة انت مستنيها من زمان وتعبت اوي عشان تحققها ، عارف الفرحة اللي بتبقى من النوع دة ، فارحة غالية ، المفروض علينا كبشر منمنحش الفرحة دي لأي حد او اي موقف لازم تخرج للناس والمواقف اللي تستحقها بجد ، الكعبة ومسجد الرسول وكل الحاجات اللي ليها علاقة بالجانب الروحي هيمن الحاجات اللي تستحق النوع دة من الفرحة والأنشغال
اللي نطلع بيه من الجزئية دي انك ممكن تفرح انك هتسافر برة مصر ، هتركب طيارة ، رجلك هتلمس ارض غير ارض مصر ، هتشوف جنسيات تانية كتير هيكون معاك صحبة مش هتتعوض هتمر بخبرات جديدة ، لكن كل الحاجات دي افرح بيها فرح ذهني ما تخليهوش يكبر اكبر من حجمه لأن الحاجات دي هو دة وزنها بس ... ما تستحقش فرحة اكبر من كدة ، الفرحة اللي بجد هي السبب الرئيسي للزيارة وهو الله وبيته الكعبة الشريفة ومسجد رسوله (ص) وليس اي شيء أخر
وللي عاوز ياخد خبرة عن اول مرة ركوب طيارة يشوف الفيديو دة
هي خبرة حلوة ، بس مش لاوم تاخد اكبر من حجمها
ونصيحة ما تنساش تاخد معاك لبان وتنضغه طوال الرحلة عشان ودنك وضغط الجو اللي هتحس بيه في الجو
ورحلة سعيدة إن شاء الله
ودي صورة الطيارة وهي فوق السحاب ، وكأنك فوق الجليد سبحان الخالق بجد
هنبدأ الأستعداد لزيارة بيت الله الحرام ومدينة رسوله العظيم قبل السفر بـ عشر أيام تقريبا
1- كلم نفسك عن الرحلة وانك من الناس اللي ربنا اصطفاها لزيارة بيته وان دي نعمة كبيرة لازم تحمده عليها وتقدّر قيمتها، كلام الواحد مع نفسه المتكرر عن حاجة بعينها بيعكس اهتمامه بالحاجة دي وبيخليك تركز على تنفيذها بشكل اكتر فاعلية
2- طبعاً الأستعداد النفسي ودة اتكلمنا فيه في الجزئية السابقة ، بس نسترجل شوية في الفترة دي ... نصلي في المعاد ونبطل هزار زايد ونقوي الروحنيات شوية ، مش هتستشيخ بس هتفكر في حاجة مش كتير بيفكروا فيها وهي احنا ربنا خلقنا ليه ... وانا مين ... وعملت ايه ... وجنيت ايه لغاية دي الوقتي ... ورايح فين ... والنهاية ايه ... وانا شايف نفسي فين من الحاجات دي كلها ، خليها عملية اعادة تقييم لمشوارك وخططك وشوف فين ربنا من الحاجات دي كلها
3- أنوي أنك تشحن طاقة روحية كبيرة اوي من الرحلة دي وقرر انك لازم في حاجة فيك هتتغير او هتزيد في دورك تجاه ربنا او تجاه نفسك او تجاه الناس ويا حبذا لو كانت على ال 3 مستويات
4- فكر في انك في حاجات كتير هتلفت انتباهك في الرحلة دي ، بس انا هاشغل بالي وتركيزي بربنا بس ، لما توصل عند الرسوال ص أو عند الكعبة انفصل بإدراك عن وجود كل الجنسيات المختلفة دي هناك وعن اهلك اللي معاك وعن اي شيء حولك وركز جدااااااااااا مع الرسول ص او مع البيت وربنا ومشاعرك وبس ، بجد والله هتفرق معاك كنتيييييير لو دربت نفسك على دة ، لانه مش سهل
في ناس بيبقى نفسها جدا تشوف الكعبة وتغسل روحاها وخطاياها هناك ، بس في من الناس اللي تركيزه بينشغل في ان الناس كتييير اد ايه وان الناس دي لابسة ايه او ان اللي جمنبك بيصلي ازاي او ان لغته غريبة او اي طقوس مخالفة او جديدة عليك ، انفصل تماما عن اي حاجة من الحاجات دي ... انا تركيزي بس مع ربنا ومع البيت وازاي اتواصل مع المولى وحده بأقصى درجة ممكنة وبأعلى جودة
5- بجد والله العظيم تبقى بطل لو قرأت او سمعت او شاهدت سيرة الرسول صلى الله عليه وسلم والله بجد هتفرق معاك جداااااااا ، لأنك بمنتهى البساطة لو دة حصل هتبقى عارف كويس جدا وبأدق التفاصيل مين الشخص اللي انت رايح تزوروه ودة لينك حلقات برنامج على خطى الحبيب برنامج استاذ عمرو خالد اللي استعرض حياة الرسول بشكل مبسط وازاي نتعلم منه في حياتنا المعاصرة ، بجد هتفرق اوي ياريت تحاول
6- الشنطة والأغراض الاساسية اللي انت هتحتاجها وأوعى تنسى لبس الأحرام وكتر من الجلاليب ، من النصايح اللي ممكن انصحك بيها في الجانب دة ، هو انك تقعد مع نفسك خمسة كدة وتكتب في ورقة اهم الحاجات اللي انت هتحتاجها بشكل شخصي هناك وابدا في تجهيزها واحدة واحدة
7-أتعلم إزاي تدعي ن ومتستغربش من الكلام دة مش كلنا فعلا بنعرف ندعي ومش كلنا عارف فلسفة الدعاء والأستغلال الأمثل للدعاء ، بلاش فردية وعشوائية وسطحية في الدعاء وأسمع الأديو دة هيفيدك
8- الهدايا ، اتعامل معاها بردو على المستوى الذهني ، اعمل ورقة وحدد ميزانية الهدايا والأشخاص بردوا اللي انت ناوي تهاديهم ، ودة طبعا قبل السفر عشان ما تشغلش بالك بالكلام دة هناك. ونصيحة من مجرب اشتري الهدايا من المدينة الفرص هناك اكتر وارخص والأسواق كتييييييير.
9- التصوير ، طبعا انت مش رايح تتصور ، بس ما فيش مانع من التصوير لكن مش من اول يوم زيارة ، يعني مش اول مرة تروح للرسول ص تروح وانت في ايدك كاميرا وبتخطط للتصوير ، خليها في اواخر الأيام وبنية تذكر افضل ايام عمرك مش بنية استعراض اني متتدين او اني زرت المسجد النبوي وبيت الله الحرام.
10- أتعرف على المناسك ، في الغالب الرحلات اللي بتخرج من مصر بتبتدي بالمدينة وبتختم بمكة وبيحرصوا انك تقضي يوم جمعة بالمدينة ، ويوم جمعة اخر بمكة ، هأنقول ان البداية إن شا ءالله في المدينة ، يبقى اهلا بالود والراحة النفسية والأحاسيس الربانية العالية وجو الود والمحبة والألفة وقبل كل دة طبعا أهلا بزياة أفضل خلق الله من بداية الخليقة ومنذ سيدنا أدم حتى قيام الساعة وأهلا كذلك بزيارة صحابة رسول الله ص وخلفاء المسلمين وعظماء الارض سيدنا ابو بكر الصديق وسيدنا عمر بن الخطاب رضي الله عنهم وارضاهم حقا هم اعظم الرجال بما في كل الكلمة من معاني
قصة معز مسعود للاحساس بحب الرسول عند مسجده
هنرسم سيناريو للرحلة كالتالي
غدا ان شاء الله السفر ، الشنطة جاهزة وكله تمام وكل الامور اللي احنا ذكرناها مسبقا محطوطة في ذهننا كويس يبقى على بركة الله ن بسم الله توكلنا على الله وبسم الله نبدأ رحلتنا ... رايحين المطار .... وصلنا الحمد لله المطار وقمنا بكل الأجراءات وطلعنا الطيارة وطارت واخترقت السحاب ووصلنا بفضل الله إلى جدة ، نزلنا من الطيارة وخلصنا الاجراءات طبعا هتلاقي اتوبيس مكيف مستنيك عشان ينقلك من جدة للمدينة ، المشوار هياخد تقريبا 7 ساعات على ما اتذكر ، جهز هتعمل ايه خلال الفترة دي خلي معاك مياة بس بلاش تكتر عشان الطريق والحمامات وجهز هتعمل ايه هتنام ولا هتقرا حاجة مفيدة ولا هتسمع حاجة من على التليفون
وصلنا المدينة الحمد لله ، طبعا طبعا مرهق ، هيتم توزيعنا في الفندق وكل مجموعة هتاخد غرفها ، عرفت انت فين توكل على الله واطلع استريح واحمد ربنا انك وصلت بالسلامة ، من الواجب طبعا طمئنة ألاهل وخاصة الخاصة في مصر لأنهم اكيد هيكونوا قلقانين ........ حصل الحمد لله يقى راحة او تفريغ الشنط ثم راحة او تفريغ الشنط ثم دوش ثم راحة
في الغالب الفندق هيبقى قريب جدا من المسجد النبوي ، اولا استعد كويس والبس اللبس المناسب وتوكل على الله وانوي زيارة رسول الله ص بجد احساس مش هتصدقه وانت نازل ، انا بألبس وباستعد عشان رايح اسلم على الرسول واقعد عنده شوية وراجع
والله انا جسمي بيأشعر وانا بكتب الكلام دة دي الوقتي
لبست واستعديت وتوجهت ، علّم طريقك واعرف مكان الفندق فين وميزه بحاجة عشان ماتهوش وانت راجع والطريق اللي تمشي منه ارجع منه ودة في البداية عشان نتجنب اي توهان ويا حبذا لو تحتفظ بكارت الفندق وانت نازل خارج وياريت تعرف انت دخلت من انهي باب في المسجد واعرف اسمه ، كل باب هناك له اسم محدد مثل باب جبريل وباب السلام
المسجد ديكوره رهيب وكبيييييييير وفسييييييح ماشاء الله ومتحضر جدااااااااا ومبهر بس دة كله هنتعامل معاه ذهنيا الأهم منه الرسول عليه الصلاة والسلام اللي احنا نازلين له مخصوص ، يا حبذا طبعا لو كنت قاري او سمعت سيرة الرسول قبل الزيارة لأن دة هيساعدك كتييييييييييييييييير اوي في انك تحس بقيمة المكان اللي انت هتكون فيه وتحس اكتر بإيمان راسخ بقيمة الشخص اللي انت هتقف قصاده ، اصل العملية مش هعملية الناس رايحة ف انا رايح ، لازم تكون من القلة المدركة بشكل صحيح قيمة المكان والأشخاص اللي انت في حضرتهم المسجد النبوي الشريف هو ثاني المساجد قدسية عندنا بعد مكة المكرمة والصلاة في المسجد النبوي مضاعفة بألف صلاة فيما سواه إلاّ المسجد الحرام فإن الصلاة فيه بمائة ألف صلاة ،
اول ما هتدخل من باب المسجد ، ممكن تسأل عن مكان الروضة ، ولو عاوز تروح لها مخصوص ممكن تدخل من باب السلام ومن العلامات المميزة للباب دة هي القبة الخضرة للمسجد من برة وتحتها تقع الغرقة الشريفة التي بها قبر الرسول ص وصاحبيه سيدنا ابو يكر وعمر رضي الله عنهما
وباب السلام هو اقرب مدخل للروضة ومن العلمات المميزة للروضة إحاطة مكانها بسجاد أخضر ، المسجد كله مفروش بسجاد احمر معادا الروضة الشريفة ، مفروشة بسجاد اخضر ، وسواء كنا ذكور او إناث ، كل نوع له وقت محدد بس في الغالب الرجال لهم النصيب الأكبر من الوقت ، لكن النساء في الغالب بيسمحوا لهن بالدخول للجلوس بالروضة في الغالب من الساعة العاشرة ص حتى صلاة الظهر ، بس يحبذ التأكد من المعلومة دي ، ولا مجال ولا سبيل للتنازل عن زيارة الرسول ص والجلوس بالروضةشرح حديث الرسول صلى الله عليه وسلم: ما بين بيتي ومنبري روضة من رياض الجنة
هذا الحديث رواه الترمذي ومعنى هذا الحديث أن هذه البقعة لها شرف وفضيلة، فمن صلى فيها فكأنه يتبوأ روضة من رياض الجنة، فيفيد كثرة الأجر لمن صلى في هذه البقعة .
تحتوي الروضة الشريفة على الحجرة الشريفة في الجهة الشرقية ومحراب النبي صلى الله عليه وسلم في وسط جدارها من ناحية القبلة والمنبر الشريف في جهتها الغربية
إحساس راقي في الروضة الشريفة في مسجد الرسول
من الأمور اللي هتساعدك في الشعور بقيمة المكان اللي انت موجود فيه وبقيمة العظماء اللي انت في حضرتهم ، إنك تذكر نفسك بالحقايق دي ، هنا يوجد رسول الله ص ، اعظم مخلوق على وجه الأرض الشخص اللي اتحمل كتييييييييييييييير اوي عشانا ، الشخص اللي غير الارض ، الشخص اللي ربنا اختاره عشانيكون سبب لهدايتنا ، الشخص اللي مر بأصعب وأشد المواقف واللي ما يستحملهاش حد وصبر عشان بيحبنا ، فكر نفسك بكل موقف تعرفه عن الرسول ص
دة هيساعدك كتييييييير اوي على ان يكون في تواصل كبييييييييير اوي بينك وبين الرسول ص وافتكر كمان مواقف لسيدنا ابو بكر الصديق رفيق الرسول ص في الغار ولفاروق الامة اكثر الناس شجاعة وأيجابية سيدنا عمر بن الخطاب رضي الله عنهم وارضاهم
أستمتع اوي اوي اوي على اد ما تقدر وقدّر قيمة كل ثانية بتقضيها في المكان دة ، وبجد انسى كل حاجة الناس والزمن والاهل والأصدقاء والشغل وكل حاجة وفكر وركز اوي في التواصل مع الرموز اللي انت معاهم ، في مبدأ جميل اوي اسمه الأنفصال من أجل الأتصال ، وهو انك تنفصل عن اللي حوليك من اجل الأتصال بحاجة معينة انت مركز فيها رغم ان ملهاش وجود مادي ملموس ، زي فكرة الخشوع الأنفصال عن الواقع والناس من اجل الأتصال بالله ، ربنا يكتب لي ويكتب لك مشتاق زيارة رسوله قريب إن شاء الله ... اللهم اميييييييين
من كل قلبي بأتمنى لكم زيارة سعيدة وقيّمة وغالية للرسول ص وصاحبته رضي الله عنهم وارضاهم
في مزارات برضوا هتستمتع بيها جدا في المدينة ، وبرضوا استمتع بالجو هناك وبالخروج وبالصحبة بس خلي النية الأكبر للرسول ص والبيت ، معلومة للي بيحب التمور ، احلى تمور ممكن تشتريها من المدينة ، اسأل عن سوق التمور
في نهاية أيام المدينة ، هتحس بنوع من الأحاسيس مختلف ... أحساس فراق الأحباب ، هتحس ان قلبك يبيتقبض وان روحك بتنسحب منك ، بس دة الواقع ... خليكي ايجابي واقنتكر الأيام الحلوة اللي انت قضيتها وافتكر ان لسة عندك ايام ممتعة في انتظارك بمكة ، وادعي انها ما تكنش اخر زيارة ليك ان شاء الله وادعي ان ربنا يكتبها لك كمان وكمان انت وكل المشتاقين
ـــــــــــــــــــــــــــــــــــــــــــــــ
دقت ساعة الفراق والرحيل وحانت ساعة التوجه إلى مكة المكرمة ، نعم إنها مكة المكرمة ، الكعبة الشريفة تنتظرك هناك أستعد كويس أوي أوي وتعالى نتعرف على عملية الأحرام
أول خطوات الأستعداد للذهاب لمكة هو انك تُحرم ومعنى الأحرام انك تنوي الدخول في النسك ، لأداء فريضة العمرة وفي أمكان كتييييييير ممكن تحرم منها ومكان الأحرام دة يسمى الميقات ، وبيتم تحديد الميقات ((المكان اللي هتحرم منه وهتنوي الدخول في النسك)) وفقا للمكان اللي انت جي منه وانت متجه لمكة
لو مثلا انت جي من المدينة لمكة ودة الغالب علينا أهل مصر يبقى الميقات لك هو مسجد أسمه مسجد التنعيم ، امامك اختيارين ، يا إما تحرم من الفندق بالمدينة وتغتسل _ والأغتسال سنة في حق الرجال والنساء حتى الحائض والنفساء_ وتنوي الأحرام وتتوكل واول ما توصل مسجد التنيعيم تأكد على الأحرام وتصلي ركعتين
والأختيار التاني انك تحرم مباشرة من مسجد التنعيم بمعنى انك تغتسل هناك وترتدي زي الأحرام هناك وبعدها تصلي ركعتين وتأكد على نية الأحرام
أول ما تخلص الركعتين تُحرم ... وللإحرام شروط ومحظورات وهي موجود على الرابط دة
وبعد نية الأحرام بنلبّي وبنقول ((لبيك عمرة - لبيك اللهم لبيك ، لبيك لا شريك لك لبيك ، إن الحمد والنعمة لك والملك ، لا شريك لك ))
ويرفع الرجل صوته بذلك والمرأة تقول بقدر ما يسمع من بجنبها ،
والتلبية مشروعة في العمرة من الإحرام إلى البداية بالطواف
دخول مكة المكرمة ، اول ما تقرب وتظهر بيوت مكة هنقول: "اللهم اجعل لي بها قراراً وارزقني فيها رزقا حلالاً. اللهم أن هذا الحرم حرمك والبلد بلدك والأمن أمنك والعبد عبدك جئتك من بلاد بعيدة بذنوب كثيرة وأعمال سيئة أسألك مسألة المضطرين إليك المشفقين من عذابك أن تستقبلني بمحض عفوك وأن تدخلني جنة النعيم. اللهم أن هذا حرمك وحرم رسولك فحرم لحمي ودمي وعظمي على النار. اللهم آمني من عذابك يوم تبعث عبادك. أسألك بأنك أنت الله الذي لا إله إلا أنت الرحمن الرحيم أن تصلي وتسلم على سيدنا محمد وعلى آله وصحبه وسلم تسليماً كثيراً
هتوصل الفندق وهتطلع تحت شنطتك ، في الغالب بتتوجه بعدها على طول لأداء العمرة او في نفس اليوم على الأكثر، أحساس بقى رهييييييييييب ، عظمة ورهبة وفخامة وعزة وهوية أسلامية ، إحساس إنك في مكان عظيم جدااااا ، بجد هو أعظم مكان على وجه الأرض ، تحس إنك فعلا خرجت من كوكب الأرض في زيارة إلى الله سبحانه وتعالىانا حظي كان ان اول طلة ليا على الكعبة كانت من الدور العلوي ، بجد منظر لا يمكن انساه في حياتي ، من اغلى المواقف بجد اللي مريت بيها من ساعة ما اتولدت
اللي عاوز اقوله ان المنظر من فوق بدييييييع كاشف كل حاجة قصادك ، بتستمع جدااااااااااااا ، الطبيعي انك تبتدي من تحت ، لكن احرص انك ممكن بعد ما تخلص تاخد جولة من فوق وبجد احساس من الاحاسيس اللي لا يمكن تنساها انك تجيب مصحف وهتلاقي كراسي هناك كتيييييير تاخد المصحف والكرسي وتقعد في جنب في ساحة الطواف بالدور الثاني وتقرأ القرءان وعينك على الكعبة ... بجد أحساس لا يوصف
نرجع لخطوات الأستعداد لدخول المسجد الحرام ، أول ما تدخل المسجد الحرام برجلك اليمين طبعا هتقول (( بسم الله والصلاة والسلام على رسول الله ، اللهم اغفر لي ذنوبي وأفتح لي ابواب رحمتك ، أعوذ بالله العظيم وبوجهه الكريم وبسلطانه القديم من الشيطان الرجيم))
واول حاجة بتعملها بعد كدة انك بتتوجه للحجر الأسود ، هو شمال باب الكعبة على طول وفوقيه على أستار الكعبة اربع علامات بتميزه كما بالصورة بالظبط ، بتتبدي الطواف من هناك بيبقى البيت على شمالك وبتبتدي من عند الحجر الاسود
لو في الأمكان تقبيل الحجر الاسود توكل واعملها لو في تزاحم شديد هناك كالعادة إياك تقاتل عشان تقبّله ، كل اللي هتعمله انك ترفع ايديك اليمين وتكون امام الحجر الاسود او على امتداده وتقول(( بسم الله والله أكبر ، اللهم إيماناً بك وتصديقا بكتابك ووفاء بعهدك واتباعا لسنة نبيك محمد صلى الله عليه وسلّم ))
هتلف يمين وتخلي البيت على شمالك ، هنقسم البيت اربع اركان ابتدأ من الحجر الأسود ، عشان نسهّل الشرح
الركن الأول >>> من الحجر الاسود حتى بداية حِجر سيدنا أسماعيل
الركن التاني >>> كله مستوعب حِجر سيدنا أسماعيل
الركن التالت >>> من حِجر سيدنا أسماعيل حتى الركن اليماني
الركن الرابع >>> يبدا بالركن اليماني وحتى الحجر الأسود
بعد دخول المسجد وبعد قول الدعاء الخاص بدخوله ، هتتوجه للحجر الأسود لبداية العمرة ويكون على شمالك وتستقبله بقولك (( بسم الله والله أكبر ، اللهم إيماناً بك وتصديقا بكتابك ووفاء بعهدك واتباعا لسنة نبيك محمد صلى الله عليه وسلّم )) وإذا تيسر تقبيله كان بها مكانش توكل واستكمل وقول في بقية طوافك ما تحب من ذكر ودعاء وقراءة قرءان حتى الوصول للركن اليماني ومكانه كما موضح بالصورة أعلاه ، يتم أستقباله من غير تقبيل وتقول في المسافة بينه وبين الحجر الأسود ((ربنا أتنا في الدنيا حسنة وفي الأخرة حسنة وقنا عذاب النار اللهم إني أسألك العفو والعافية في الدنيا والأخرة))بمجرد وصولك للحجر الأسود كدة تتحسب شوط واحنا عندنا 7 اشواط ، وكل ما بتمر بالحجر الأسود كبّر ((الله أكبر )) وقول في بقية طوافك ما تحب من ذكر ودعاء وقراءة قرءان
فإنما جعل الطواف بالبيت وبالصفا والمروة ورمي الجمار لإقامة ذكر الله
وفي بداية الطواف ينبغي للرجال فعل شيئين :
الاول : الأضطباع من أبتدأ الطواف إلى نهايته وصفة الأضطباع ان يجعل وسط ردائه داخل إبطه الأيمن وطرفيه على كتفه الايسر ، فإذا فرغ من الطواف أعاد رداءه إلى حالته قبل الطواف ، لأن الأضطباع محله الطواف فقط
الامر الثاني : الرمل في الأشواط الثلاثة الأولى فقط والرمل إسراع المشي مع مقاربة الخطوات ، وأما الاشواط الاربعة الباقية فليس فيها رمل وإنما يمشي كعادته. وطواف النساء وسعيهن مشي كله وأجمع أهل العلم أنه لا رمل على النساء حول البيت ولا بين الصفا والمروة وليس عليهن اضطباع.
بعد إتمام سبعة أشواط حول الكعبة يتم التقدم إلى مقام سيدنا إبراهيم ويتم قراءة (وأتخذوا من مقام أبراهيم مصلى) ثم تصلي خلفه ركعتين خفيفتين يقرأ في الأولى (قل يا ايها الكافرون) وفي الثانية (قل هو الله أحد) وبعد الأنتهاء من الصلاة يتم أستلام الحجر الاسود إن تيسر ثم الخروج إلى المسعى.
وانت بتقرب من الصفا قول ((إن الصفا والمروة من شعائر الله )) ويتم الارتقاء للصفا وتنظر في اتجاه الكعبة وانت عند الصفا وترفع ايديك اليمين وتدعوا باللي انت عاوزه وكان من دعاء النبي ص ((لا إله إلا الله وحده لا شريك له ، له الملك وله الحمد وهو على كل شيء قدير. لا إله إلا الله وحده أنجز وعده ونصر عبده وهزم الأحزاب وحده )) ويتم تكرار دة 3 مرات وممكن تدعي بين كل مرة ومرة.
وتبدأ السعي من الصفا إلى المروة ماشيا واول ما بتوصل عند الأضواء الخضرة في السقف بتهرول وتجري لغاية الضوء الأخضر التالي والهرولة دي هتكون للرجال فقط ، النساء لا تهرول ابداًفطواف النساء وسعيهن مشي كله وأجمع أهل العلم أنه لا رمل على النساء حول البيت ولا بين الصفا والمروة وليس عليهن اضطباع.وبعد الضوء الأخضر التاني ترجع تمشي طبيعي جدا لغاية ما توصل للمروة وتطلع وتوقف هناك وتستقبل الكعبة وتقول نفس اللي قولته على الصفا ((لا إله إلا الله وحده لا شريك له ، له الملك وله الحمد وهو على كل شيء قدير. لا إله إلا الله وحده أنجز وعده ونصر عبده وهزم الأحزاب وحده ))
وبعد كدة يتم النزول من الصفا وتتجه نجو الصفا وتهرول بردوا بين الأضواء الخضرة ، لغاية ماتوصل للصفا وتبتدي تعمل اللي عملته قبل كدة
معلومة البداية من الصفا ، والسعي بين الصفا والمرو 7 أشواط ، من الصفا للمروة شوط ومن المروة للصفا دة الشوط الثاني وهكذا حتى تعد 7 اشواط والختام يكون بالوصول للمرة السابعة و هي بالوصول للمروة
معلومة تانية خلال سيرك في السعي قول اللي تحبه من ذكر ودعاء وقراءة قرءان ، فإنما جعل الطواف بالبيت وبالصفا والمروة ورمي الجمار لإقامة ذكر الله
وبعد الانتهاء من السعي سبعة اشواط الراجل بيحلق شعره سواء زيرو او تقصير والتقصير يشملل جميع الرأس، والمرأة بتقصر من كل قرن أنملة
أخر معلومة الحلق افضل من التقصير إلا ان يكون وقت الحج قريب ، بحيث مش هيكون هناك وقت للشعر ان ينبت فالافضل التقصير ليبقى الرأس للحلق في الحج.
وبهذه الاعمال تمت العمرة ، عمرة مقبولة وتقبل الله إن شاء الله
الفيديو شرح مناسك العمرة ، بس بعد إتمام سبعة أشواط حول الكعبة ماتنساش تتقدم إلى مقام سيدنا إبراهيم وتقرأ (وأتخذوا من مقام أبراهيم مصلى) ثم تصلي خلفه ركعتين خفيفتين يقرأ في الأولى (قل يا ايها الكافرون) وفي الثانية (قل هو الله أحد) وبعد الأنتهاء من الصلاة يتم أستلام الحجر الاسود إن تيسر ثم الخروج إلى المسعى.
معلومة أخيرة هأكد عليها ، الوسطية اهم حاجة وانك تكون منظم مش عشوائي دة بردوا مهم ، أستمتع بكل حاجة حواليك ، بكل تفصيلة صغيرة في الرحلة بس ادي كل حاجة قدرها وأهميتها اللي تستاهلها ووقتها اللي تتعمل فيه ، وأفتكر كويس جدا ان الهدف الرئيسي من الرحلة هو أداء فريضة العمرة والطواف بالكعبة وزيارة رسول الله ص وصحابته الكرام رضي الله عنهم وارضاهم ، بس مش معنى كدة انك مش هتتمشى في الشوارع وتشتري هدايا وتروح مزارات وتستمتع بطبيعة مكة والمدينة ، ركز في الموقف اللي انت هتكون بتمر بيه هناك ومتشغلش دماغك وقتها بحاجات تانية ، وانت في الكعبة ركز مع الكعبة وربنا وأفتكر مبدأ الأنفصال من أجل الأتصال ، هأنفصل عن الناس عشان اتصل بالله ، ولما يجي وقت الخروج والهدايا والمزارت عيشه واستمتع بيه
طبعا بعد مرور الأيام هناك ، بتيجي ساعة العودة وبتبقى الأحاسيس صعبة ، بس ركز في الدعاء ان ربنا يكتب لك الزيارة مرة تانية ان شاء الله أنت وكل مشتاق والمسلمين أجمعين.
والخطوة التالية هي العودة مرة أخرى لأرض الوطن ، ولكنها ليست عودة تقليدية
هي عودة شخص مختلف شخص أكثر إيجابية تجاه ربه وتجاه نفسه وتجاه الناس
حمد الله على السلامة
واللينكات دي لتأكيد المعلومات اللي احنا قولنها بخصوص مناسك العمرة وللإستزادةصفة العمرة
أخطاء العمرة
أحكام تختص بالمرأة في الحج والعمرة
30 نصيحة للمرأة في الحج والعمرة
التدوينة خلصت بأتمنى من كل قلبي أنها تكون مثلت إضافة للي بيقرائها
وطلب خاص لا تنسونا من صالح دعائكم هناك
نحن والأهل وجميع المسلمين
أخر حاجة أسمع الاديو دة بالضغط هنا
هيقوي إيمانك وهيلفت نظرك لمعاني ممكن انت مكنتش واخد بالك منها
السلام عليكم ورحمة الله وبركاتوا
وهنفتقدكم لغاية ما ترجعوا لنا بالسلامة إن شاء الله
