الانسان: هل ينفع تسعى بمنتهى الاخلاص لحاجة انت عاوزها وماتجيش ؟!
هل ينفع تبني كوخ يأويك من البرد والسقعة والمطرة ... والرياح تنتظر تنتهي من بناءه وبعد كدة تيجي تشيلهولك ؟!
هل ينفع تذاكر بمنتهى الاخلاص وتدخل انترفيو وتسعى وماتتقبلش ؟!
القدر: الاجابة هي اه ينفع !!! بل بالعكس الكلام دة هيحصلك كتير وهيتكرر اكتر !!!
الانسان: طيب ممكن الاقي اجابة اصبر بيها نفسي واشفي بيها نار اجتهادي واخلاصي !! ليه دة حصل ؟! دة انا عملت كل اللي عليا ؟!
القدر: اسف مافيش اجابة هتوصلك مننا .. غير انك تحسن الظن بربنا بس !
الإنسان: احسن الظن ازاي ؟! وانا تعبت ومالاقيتش نتيجة تعبي واذا مكانش الحاجة اللي انا عاوزها تحصل دي الوقتي هيكون امتى ؟!
القدر: مش مسموح لي اجاوب على الاسئلة دي !!! بس تعاطفا معاك وتدعيما ليك هاحكي لك قصتين ممكن يساعدوك في مشوارك وانك تتعلم ازاي تحسن الظن في ربك.
"قصة رمزية"
القدر: عارف يا انسان مرة كان في عصفور لسة متعلم الطيران ... وفرحان جداااا انه بدأ يعتمد على نفسه ويطير لوحده .. جاله طموح انه يبني عش لوحده ويستقل بذاته
قعد ((شهر كامل)) يبني في عشه ويطير كل يوم من بداية اليوم لأخره علشان يجمع غصون من هنا وهناك وبدأ يحط واحد فوق التاني علشان يحقق حلمه ... مكانش عنده حاجة بيعملها في حياته خلال الشهر دة غير انه يبني العش 💪
عارف ... الحلم اتحقق وانتهى من بنى العش على غصن شجرة جميلة في مكان جميل طبيعي 💪✌👌
العصفور كان تعبان جداااا بس كان فرحان بتعبه وفرحان بنجاحه .. ولما جه الليل وقرر العصفور انه يبات اول ليلة ليه في عشه بعد المجهود الكبير اللي قام بيه ... حصل اللي مكانش متوقع !! جت رياح شديدة جداااااا وقلبت العش ودمرته ومخليتش منه اي حاجة !!!
عارف العصفور عمل ايه ؟!
الانسان: اجتهد وبنى واحد جديد ؟
القدر: لا طبعا .. قعد يعيط وانهار وغضب على ربنا وقعد يكلمه بحرقة وبكاء ويسأله باستنكار ؟! انت عندك الملك دة كله !!! فرق معاك في ايه يارب العش الصغير بتاعي ؟! ليه دمرتهولي ؟! انا تعبت جداااا علشان ابنيه ؟! هل مستكتر عليا اعيش في عش صغير يأويني ويحميني ؟! ليه بعد ماتعبت وكافحت عملت فيا كدة ؟! وقعد العصفور يشكي ويشكي ويسأل ربنا بغضب ليه عمل فيه كدة ؟!
الانسان: ايه اللي حصل بعد كدة ؟!
القدر: ربنا قرر يكشف للعصفور على غير العادة هو عمل كدة ليه !!! ربنا قال للعصفور انا كنت معاك في كل لحظة بتبني فيها العش وكنت فرحان بيك جداااا وكنت فخور بيك اكتر ... بس اللي انت ماتعرفوش ان فيه ثعبان باني عشه من قبلك في مكان قريب منك جدااااا ... والثعبان كان منتظر اول ليلة ليك في عشك علشان ياكلك وينهي حياتك !!! علشان كدة انا بعتلك الرياح مخصوص علشان تنقذك من اللي انت فيه ... بس انت ماقدرتش تفهم رسالتي ليك صح !
العصفور مابقاش عارف يفكر او يتكلم وكل مشاعر الغضب اللي كانت جواه تجاه ربنا اتحولت لمشاعر متلخبطة اتحولت لمشاعر كسوف وبكاء من رحمة ربنا بيه ... العصفور قعد يبكي ويبكي على اساءته الظن بربنا وقعد يبكي اكتر على اد ايه ربنا رحيم بيه !!!
القدر: انت عارف يا انسان ان دي المرة الوحيدة اللي ربنا حكى فيها لحد وفسر له هو عمل معاه كدة ليه !
القدر: تعرف سورة الكهف في القرءان ؟!
الإنسان: اه طبعا
القدر: عارف ان ال 3 قصص اللي حصلت بين السيد الخضر والنبي موسى ... اهل القصص ماتوا وماعرفوش الحكمة من اللي حصل معاهم
1) مات اهل السفينة وهم مايعرفوش ان لولا خرقها ما كانوا نجوا بيها !!!
2) ومات اهل الغلام اللي اتقتل ... وهم برضوا مايعرفوش ان لولا قتله لكانوا هيعانوا جداااا بحياته !!!
3) والاطفال اليتامي ... اخدوا فلوس ابوهم وامهم اللي كانوا تحت الجدار ... من غير مايعرفوا ان ربنا هو اللي حافظ لهم عليها علشان" كان ابوهما صالحا"
الانسان: سبحان مسير الاقدار
القدر : خلاصة الامر يا انسان .. انك هيحصلك مواقف كتييير في ظاهرها هتكون شر بالنسبة لك !!! لكن في باطنها هتكون رحمة من ربنا بيك
كل اللي عليك انك تسعى باخلاص وسيب النتيجة على ربنا ... واحسن الظن بربك في الضراء قبل السراء
وكأجابة على اسئلتك في البداية:
س) هل ينفع تسعى بمنتهى الاخلاص لحاجة انت عاوزها وماتجيش ؟!
اه ينفع ... لان الحاجة دي ممكن يكون فيها موتك ودمارك ورحمة من ربنا بيك انه بيمنعك عنها !!!
س) هل ينفع تبني كوخ يأويك من البرد والسقعة والمطرة ... والرياح تنتظر تنتهي من بناءه وبعد كدة تيجي تشيلهولك ؟!
اه ينفع .. لان ربنا هيكون بيدعيك انك تبني قصر بدل الكوخ والقصر دة عمرك ما كونت هتبنيه الا لو اتحطيت قصاد الامر الواقع
س) هل ينفع تذاكر بمنتهى الاخلاص وتدخل انترفيو وتسعى وماتتقبلش ؟!
اه ينفع .. لان ربنا عارف انك لو قبلت في الادارة دي مش هتنجح فيها ومش هتكون زي ما انت متخيل وهيشيل لك الاحسن منها في التوقيت المناسب
خلاصة الخلاصة يا انسان ... ارضى بما قسمه الله لك تكن اغنى الناس واسعى باخلاص تجاه اي حاجة انت عاوزها بس ماتتمنهاش بشكل حازم وجازم !!! اسعى وسيب القبول من عدمه لله واحسن الظن بربك لما يحصل عكس اللي انت عاوزه
لانك لازم تتاكد ان دة الخير ليك ...
وخليك فاكر كويس جدااا انك مش هتلاقي اجابة مباشرة عن سبب منع ربنا ليك من حاجة انت عاوزها !!
بس خليك فاكر برضوا ان حسن الظن بريك اللي عمره ما هيضيعك ... هو امر بإديك :)
احسنوا الظن بربكم ... وسبحان من يمنع ليعطي ❤
